काठमाडौँ, फाल्गुन ५ गते । गोल्डेनगेट लामा टेन्डी शेर्पा स्मृति खुला बास्केटबल प्रतियोगिताको पुरुषमा बिहीबार क्वार्टरफाइनलमा प्रवेश गरेको छ । तीन टिम रहेको समूह ‘डी’ को लिग खेलमा गोल्डेनगेटले क्याम्पियन सोलोलाई ७७–६३ ले पराजित गर्दै समूह विजेता बन्यो । विजेताका कर्मा गुरुङले २७ अंक जोड्नुभयो । क्याम्पियनका मनीष राजोपाध्यायले १७ स्कोर गर्नुभयो।
त्रिपुरेश्वरस्थित राष्ट्रिय खेलकुद परिषद्को कभर्डहलमा भइरहेको प्रतियोगितामा रोयल बास्केटबल एकेडेमीले दोहोरो जित निकाल्यो । महिलाको प्रतिस्पर्धात्मक भिडन्तमा रोयलले नेपाल प्रहरी क्लबलाई ५१–५० को साँघुरो अन्तरले हरायो । रोयलकी छिरिङ शेर्पाले २४ अंक जोड्नुभयो ।
प्रहरीकी रोशनी श्रेष्ठले १५ स्कोर गर्नुभयो । यसैगरी पुरुषमा रोयलले जेभियर इन्टरनेसनल कलेजलाई ९८–६७ ले पन्छायो । रोयलका विकास गुरुङले २२ तथा जेभियरका अनिश मगरले १५ अंक बटुल्नुभयो ।
