काठमाडौँ, फागुन ११ गते । नेपाल आर्मी र टाइम्स लामा टेन्डी शेर्पा स्मृति खुला बास्केटबल प्रतियोगिताको पुरुषतर्फ फाइनलमा प्रवेश गरेका छन् । त्रिपुरेश्वरस्थित राष्ट्रिय खेलकुद परिषद्को कभर्डहलमा बुधबार भएको पहिलो सेमिफाइनलमा आर्मीले रोयल बास्केटबल एकेडेमीलाई ८२–७३ ले हरायो ।
आर्मीका रोविन खत्रीले १७ अंक जोड्नुभयो । रोयलका निकेश मगरले २५ स्कोर गरेपनि टिमलाई जित दिलाउन सक्नुभएन । महिलाको राउन्ड रोविन लिगमा भने रोयल विजेता बन्दै फाइनल पुगिसकेको छ । रोयलले फाइनलमा नेपाल प्रहरीसँग खेल्नेछ ।
अर्को सेमिफाइनलमा टाइम्सले गोल्डेनगेटलाई ८४–६७ ले हरायो । टाइम्सका विजय बुर्जाले २५ अंक बटुल्नुभयो । महिलातर्फ राउन्ड रोविन लिगको अन्तिम खेलमा रुपन्देहीले कीर्तिपुरलाई ४५–४१ ले पन्छायो । रुपन्देहीकी दीपिका गुरुङले २२ स्कोर गर्नुभयो । प्रतियोगिताको फाइनल खेल बिहीबार हुनेछ ।
