गण्डकीमा थप ५८ जनामा कोरोना सङ्क्रमण, कुल ४३८ पुग्यो

गण्डकी प्रदेशमा थप ५८ जनामा कोरोना भाइरस कोभिड १९ सङ्क्रमण पुष्टि भएको छ । प्रदेश स्वास्थ्य निर्देशनालयले शनिबार बिहान प्रकाशित गरेको विज्ञप्ति अनुसार नयाँ सङ्क्रमितसँगै प्रदेशमा कुल सङ्क्रमितको सङ्ख्या ४३८ पुगेको छ । नयाँ सङ्क्रमण पुष्टि हुनेमा तनहुँमा २५, नवलपुरमा १६, बागलुङमा ८, गोरखामा पाँच, कास्कीमा दुई, स्याङ्जामा एक, म्याग्दीमा एक जना रहेका छन् ।

डडेल्धुरा सदरमुकाम अनिश्चितकालीन सिल

कोरोना सङ्क्रमणको दर बढ्दै गएपछि डडेल्धुरा सदरमुकाम अनिश्चित्कालीन सिल गरिएको छ । शुक्रबार दिउँसो ३ बजेदेखि लागू हुने सदरमुकाम सिल गरिएको कोरोना सुरक्षा समिति डडेल्धुराले जनाएको छ ।

नारायणगढ–मुग्लिन सडकखण्डको पहिरो तीन दिन लगाएर पन्छाइयो

नारायणगढ–मुग्लिन सडकखण्डको चारकिलोमा खसेको पहिरो तीन दिन लगाएर पन्छाइएको छ । बुधबार बिहान ४ः१५ बजे खसेको पहिरो पूर्णरुपमा पन्छाएसँगै शुक्रबार साँझदेखि दुईतर्फी सवारी सञ्चालनमा आएका छन् ।

घुर्मी–चतरा करिडोर सडक निर्माण गरिने

मध्यपहाडी लोकमार्गमा जोडिने घुर्मी–चतरा खण्डको सडक निर्माण गरिने भएको छ । लामो समयदेखि अलपत्र रहेको यो सडकको निर्माणमा उदपयुर जिल्लाका कटारी नगरपालिका, लिम्चुङ्बुङ्ग गाउँपालिका र ताप्ली गाउँपालिका जुटेका छन् । कोसी करिडरका नामले चिनिने यो सडक खण्डको निर्माणमा यी तीन स्थानीय तहले संयुक्त रुपमा लगानी गर्ने भएका हुन् ।

बन्दाबन्दीमा विकास निर्माण जारी

कोरोनाको त्रास र बन्दाबन्दीमा सबै क्षेत्र नराम्ररी प्रभावित भए पनि प्रदेश ५ मा विकास निर्माणका कार्य जारी छन् । राष्ट्रिय गौरवका आयोजनासँगै अधिकांश स्थानीय तहले यो बेला आआफ्ना क्षेत्रमा पर्ने दीर्घकालीन महŒवका र आन्तरिक विकास निर्माणलाई तीव्रता दिएका छन् ।