घट्यो सुनको मूल्य

सुनचाँदी बजारमा आज छापावाल सुनको मूल्य प्रतितोला दुई सयले घढेर ९२ हजार पाँच सयमा आएको छ । पहेँलो धातु अधिल्लो दिन प्रतितोला ९२ हजार सात सयमा कारोबार भएको थियो ।

दुई करोड टन फलाम निकाल्न सकिने

पूर्वी नवलपरासीको हुप्सेकोट गाउँपालिका– ५ को धौवादी डाँडामा रहेको फलाम खानी उत्खननका लागि प्रशासनिक कार्य अन्तिम चरणमा पुगेको छ । सरकारले पूर्वी नवलपरासीको धौवादीमा रहेको फलामखानीबाट फलाम निकाल्न धौवादी फलाम कम्पनी लिमिटेड नै गठन गरिसकेको छ । अहिले सो कार्यालय काठमाडौंको खानी तथा भूगर्भ विभागको कार्यालय लौनचौर परिसरमा छ ।

नीलकण्ठमा औद्योगिक ग्राम बन्दै

धादिङको नीलकण्ठ नगरपालिकामा औद्योगिक ग्राम बन्ने भएको छ । उद्योग, वाणिज्य तथा आपूर्ति मन्त्रालयमा बिहीबार भएको सम्झौतामा नीलकण्ठ नगरपालिका–८ स्थित रामकोट घिउरिनटारमा रहेको ५० रोपनी क्षेत्रफलमा उक्त औद्योगिक ग्राम स्थापना हुने भएको हो ।

आजबाट आन्तरिक उडानको भाडा वृद्धि

वायुसेवा सञ्चालक संघले शुक्रबारदेखि लागू हुने गरी आन्तरिक हवाइ उडानको भाडादर वृद्धि गरेको छ । हवाइ इन्धनमा प्रतिलिटर दुई रुपियाँभन्दा बढीले मूल्य घटबढ भएको अनुपातका आधारमा भाडा समायोजन गर्न पाउने अधिकार संघलाई भएसँगै भाडादर १०५ रुपियाँदेखि ४४५ रुपियाँसम्म वृद्धि गरेको संघका प्रवक्ता योगराज कँडेलले जानकारी दिनुभयो । यसपटक नेपाल आयल निगमले हवाइ इन्धनमा प्रतिलिटर १० रुपियाँ मूल्य वृद्धि गरेको छ ।

एक्काइस करोड लगानी गर्दै राष्ट्र बैङ्क

नेपाल राष्ट्र बैङ्कले बैङ्क तथा वित्तीय संस्थाको मुद्दती निक्षेपमा २१ करोड रुपियाँ लगानी गर्ने भएको छ । राष्ट्र बैङ्क कर्मचारी सुरक्षण कोषमा रहेको २१ करोड रुपियाँ वाणिज्य बैङ्क, विकास बैङ्क र फाइनान्स कम्पनीमा एक वर्ष अवधि (३६६ दिन)का लागि मुद्दती निक्षेपमा लगानी गर्न लागिएको हो ।