काठमाडौंको ३२ वटै वडामा एस्ट्राजेनिका र भेरोसेलको दोस्रो मात्र खोप लागाइँदै

काठमाडौँ महानगरपालिकाले ३२ वटै वडामा कोभिडविरुद्धको खोप अभियान सञ्चालन गरेको छ। महानगरपालिकाले आज र भोलि ३२ वटै वडाबाट खोप अभियान गरेको हो । महानगरपालिकाले एस्टाजेनेकाको दोस्रो डोज र भेरोसेलको पहिलो र दोस्रो डोज सञ्चालन गरेको हो। १८ वर्ष माथिका सबै नागरिकले परिचयपत्रका साथमा विहान १० देखि ४ बजेसम्म खोप केन्द्रमा पुगेर खोप लिन सक्ने स्वास्थ्य तथा जनसंख्या मन्त्रालयले जनाएको छ।

३१३ जना नयाँ सङ्क्रमित थपिए, नौको मृत्यु

पछिल्लो २४ घण्टामा ३१३ जना कोरोना भाइरसका सङ्क्रमित थपिएका छन् । आठ हजार ७२९ जनामा आरटीपीसीआर परीक्षण गरिएकोमा ३१३ जनामा कोरोना सङ्क्रमण पुष्टि भएको स्वास्थ्य तथा जनसङ्ख्या मन्त्रालयले जनाएको छ ।

खोप कार्ड देखाएर नेपाल र भारत आवतजावत गर्न पाइने

नेपाल सरकारले भारतसँग कोभिड खोप प्रमाणपत्रको आधारमा आवतजावतलाई मान्यता दिने समझदारी गरेको छ । मङ्गलबार स्वास्थ्य तथा जनसङ्ख्या मन्त्रालयमा आयोजित कार्यक्रममा खोप प्रमाणपत्रको आधारमा आवतजावतको मान्यता दिनेगरी समझदारी भएको हो । उक्त समझदारी पत्रमा स्वास्थ्य सचिव डा. रोशन पोखरेल र नेपालका लागि भारतीय राजदूत विनय मोहन क्वात्राले हस्ताक्षर गर्नुभएको छ ।

कर्णालीमा पहिलो पटक सरुवा रोग अस्पताल स्थापना

कालीकोट जिल्लामा सरुवा रोग अस्पतालको उद्घाटन गरिएको छ । एकीकृत भवनमा रहेको कोभिड अस्पताललाई एक समारोहकाबीच सरुवा रोग अस्पतालमा रुपान्तरण गरिएको हो ।

प्यूठानमा एक लाख बढीलाई खोप लगाईंदै

प्यूठानका एक लाख नागरिकहरुलाई कोरोना विरुद्धको खोप लगाइने भएको छ । प्यूठानका नौ वटा स्थानीय तहका जम्मा दुई लाख ४३ हजार १८६ जना नागरिक मध्ये १८ वर्ष माथि उमेरका एक लाख १७६ जनालाई खोप लगाउने तयारी भएको स्वास्थ्य कार्यालय प्यूठानका प्रमुख मधुसुदन खड्काले जानकारी दिनुभयो ।