राजविराजमा बुद्ध एयरको दैनिक उडान

पर्यटन वर्ष २०२० लाई लक्षित गरी बुद्ध एयरले काठमाडौदेखि सप्तरीस्थित ‘राजविराज विमानस्थल’ मा दैनिक उडान सेवा भर्न शुरुआत गरेको छ । एयरलायन्सको ९ एनएजेओ नंको विमानले शनिबारबाट दैनिक उडान सेवा शुरु गरेको हो । यात्रुको बढ्दो चाप तथा पर्यटनलाई लक्षित गरी एयरलायन्सले दैनिक उडान सेवा थालेको जनाएको छ । हाललाई रु दुई हजार ५०० न्यूनतम भाडादर कायम गरिएको छ ।

सवारी जामले चालक र बटुवालाई सकस

राजधानीको चावहिल मित्रपार्कमा सवारी चालक तथा बटुवा दुवैलाई आवागमनमा सकस छ । बौद्ध–गुह्येश्वरी खण्डबाट मित्रपार्क, कालोपुल हुँदै मित्रपार्क, गौशालाबाट मित्रपार्क र चावहिल स्तुपाबाट मित्रपार्क जोडिने विभिन्न सडकले गर्दा मित्रपार्कमा बटुवालाई बाटो काट्न र सवारी चालकलाई सवारी हाँक्न निकै कष्ट भइरहेको छ ।

शिक्षा, स्वास्थ्य र रोजगारी समाजवादका आधार- नेता पाेखरेल

सत्तारूढ नेपाल कम्युनिष्ट पार्टी (नेकपा) स्थायी समिति सदस्य लीलामणि पोखरेलले शिक्षा, स्वास्थ्य र रोजगारी समाजवाद स्थापनाका मूल आधार भएको बताउनुभएको छ । अखिल नेपाल शिक्षक सङ्गठनले आज आयोजना गरेको कार्यक्रममा उहाँले समाजवादको तयारीका लागि सरकारमा कम्युनिष्ट पार्टी भए पनि राज्यसत्ताको चरित्र र चिन्तन नबदलिएको उल्लेख गर्दै सुरक्षा निकाय र न्यायालय अझै पुरानो ढर्रामा रहेका टिप्पणी गर्नुभयो ।         

नेकपा वडा कमिटी अध्यक्षमाथि कुटपिट

बैतडीमा नेकपाका वडा कमिटी अध्यक्षमाथि कुटपिट भएको छ । कुटपिटबाट वडा अध्यक्षको दाहिने हात भाँचिएका छ भने देब्रो हातमा गम्भीर चोट लागेको छ । दशरथ चन्द नगरपालिका वडा नम्बर १० का नेकपा वडा कमिटी अध्यक्ष प्रकाश लावडमाथि शुक्रबार अपरान्ह वडा कार्यालयमै कुटपिट भएको हो । कुटपिटमा संलग्न सोही वडाका त्रिलोक बिष्टलाई प्रहरीले थुनामा राखेको जिल्ला प्रहरी कार्यालय बैतडीले जानकरी दिएको छ ।

डढेलोमा परेर एक महिलाको मृत्यु

लमजुङमा डढेलोमा परेर एक महिलाको मृत्यु भएको छ ।