युक्रेनबाट ५३३ नेपाली सुरक्षित रूपमा बाहिरिए : परराष्ट्रमन्त्री खड्का

परराष्ट्रमन्त्री नारायण खड्काले युक्रेनबाट ५३३ नेपाली छिमेकी मुलुकमा पुगिसकेको जानकारी दिनुभयो । सोमबार मन्त्रालयमा आयोजित प्रेस ब्रिफिङमा मन्त्री खड्काले युक्रेनबाट ५३३ नेपाली सुरक्षित रुपमा बाहिरिएको बताउनुभएको हो । उहाँका अनुसार उद्धार गरिएकाहरुमध्ये ४२७ जना पोल्याण्ड र बाँकी अन्य देशमा सुरक्षित रहेका छन् ।

मेलम्ची मुहानको मर्मत ८० प्रतिशत सम्पन्न, चैतभित्र पानी ल्याइने

२०७७ गते असार १ गतेको बाढी पहिरोले क्षति पुगेको मेलम्ची खानेपानी आयोजनाको मर्मत कार्य ८० प्रतिशत सम्पन्न भएको छ । चैत भित्र काठमाडौं उपत्यकामा अस्थायी रुपमा भए पनि पानी ल्याउने तयारीमा पुगेको मेलम्ची खानेपानी वितरण विकास समितिका प्रवक्ता राजेन्द्रप्रसाद पन्तले जानकारी दिनुभयो ।

वायुसेवालाई साउदी अरेबियाको उडान अनुमति

नेपाल वायुसेवा निगमलाई साउदी अरेबियाको रियाद, दमाम र जेद्दा उडानको अनुमति प्रदान गरिएको छ । नेपाल वायुसेवा निगमलाई साउदी अरेबियाको नागरिक उड्डयन कार्यालय जेनरल अथोरीटी अफ सिभिल एभिएसन्स् रियादले त्यहाँका तीनवटा सहर जेद्दा, दमाम र रियादमा दुईतर्फी उडानको अनुमति दिएको नेपाल वायुसेवा निगमका कार्यकारी अध्यक्ष युवराज अधिकारीले जानकारी दिनुभयो ।

आगलागी घटनाको निरीक्षण गर्न नेता पौडेल दमौलीमा

तनहुँमा आइतबार भएको आगलागी घटनाको निरीक्षणको लागि नेपाली काँग्रेसका वरिष्ठ नेता रामचन्द्र पौडेल दमौली आउनुभएको छ । वरिष्ठ नेता पौडेल अग्नीपीडित वासिन्दासँग भेटेर क्षतिकाबारेका जानकारी लिनुभयो । प्रमुख जिल्ला अधिकारी विश्वप्रकाश अर्याल र जिल्ला प्रहरी कार्यालय तनहुँका प्रमुख राजेन्द्रबाबु रेग्मीलाई राहतको कार्य तत्काल अघि बढाउन उहाँले निर्देशन दिनुभयो ।

तोकिएको समयमा स्थानीय तहको निर्वाचन गर्न सरकार प्रतिवद्ध छ : मन्त्री कार्की

सञ्चार तथा सूचना प्रविधि मन्त्री ज्ञानेन्द्रबहादुर कार्कीले सरकार तोकिएकै समयमा स्थानीय तहको निर्वाचन गर्न प्रतिवद्ध रहेको बताउनु भएको छ । गोरखापत्र संस्थानको अवलोकन भ्रमणका क्रममा बोल्दै मन्त्री कार्कीले सरकार तीनवटै तहको निर्वाचन समय मै सम्पन्न गर्न प्रतिवद्ध रहेको बताउनुभयो ।