मुसहर समुदायले मागे जिविकोपार्जनका लागि सीप र ज्ञान

उदयपुरको त्रियुगा नगरपालिकाका मुसहर समुदायले जीविकोपार्जनका लागि ब्यवसायिक सीप र ज्ञान माग गरेका छन् । उनीहरुले पेशा परिवर्तन गरी शिक्षा, स्वास्थ्य लगायत जिविकोपार्जनमा सहजता ल्याउने उद्देश्यले नगरपालिकाले आयोजना गरेको अन्तरक्रियामा यस्तो माग राखेका हुन् ।

किसानद्वारा पाहुनालाई गुन्द्रुक उपहार

प्रचार प्रसारका लागि दोलखाको शैलुङ गाँउपालिका –८ झोर गाँउका बासिन्दाले पाहुनाहरुलाई काउलीको पातबाट बनाइएको गुन्द्रुक उपहार पठाउने गरेका छन् । मेहेनती किसानहरुको गाँउ झोर काउली र आलु खेतीमा अब्बल रहेको छ । यो गाँउको प्रत्येक घरमा काउलीको पातको गुन्द्रुक बन्नेगरेको स्थानीय किसान अकुरबहादुर श्रेष्ठले बताउनुभयो ।

डकैती गर्ने दुई जना भारतीय पेस्तोलसहित पक्राउ

बाँके र बर्दियाका विभिन्न स्थानमा पेस्तोल देखाई परिवारलाई बन्धक बनाएर डकैति गर्दैआएका दुई जना भारतीयलाई प्रहरीले पेस्तोलसहित पक्राउ गरेको छ । जिल्ला प्रहरी कार्यालय बाँकेले दिएको जानकारीअनुसार बाँकेको खजुरामा सुन व्यवसायीको घरमा र बर्दियाको बढैयातालमा एक व्यवसायीको घरमा पेस्तोल लगायतका हतियारको भरमा डकैति गरी रकम लुटपाट गरेका दुई जना भारतीय डाँकालाई प्रहरीले पक्राउ गरेको हो ।

बागलुङमा विद्युतीय राहदानी फाराम संकलन सुरु

जिल्ला प्रशासन कार्यालय बागलुङले करिव एक महिनापछि जिल्लामा विद्युतीय राहदानी (ई–पासपोर्ट) को फाराम संकलन गर्न सुरु गरेको छ । प्रशासनले शुक्रबारदेखि ई–पासपोर्टको लागि फाराम संकलन गर्न थालेको हो ।

भरुवा बन्दुकसहित दुई जना पक्राउ

कपिलबस्तुको बाणगंगा नगरपालिका २ कोठी खोला किनारबाट प्रहरीले भरुवा बन्दुकसहित दुई जनालाई पक्राउ गरेको छ । पक्राउ पर्नेमा अर्घाखाँचीको शितगंगा नगरपालिका १४ निवासी ५० बर्षीय बीरबहादुर सोमै र सोही स्थानका २८ बर्षीय खेमु मगर रहेको ईलाका प्रहरी कार्यालय पिपराका प्रहरी निरीक्षक दिनेश गुरुङले बताउनुभयो ।