निर्वाचन मिति घोषणाको माग गर्दै ज्ञापनपत्र

नेपाल कम्युनिष्ट पार्टी (एमाले) निकट भातृ संगठनहरुले स्थानीय तहको निर्वाचनको मिति घोषणा गरेर समयमै निष्पक्ष निर्वाचन गराउन सरकार समक्ष माग गर्दै ज्ञापनपत्र बुझाएका छन् । रुपन्देहीमा क्रियाशील एमाले निकट २१ वटा भातृ संगठनले लोकतन्त्रको मुल मर्म आवधिक निर्वाचन, संवैधानिक सर्वोच्चता र नागरिकको अभिमत भएकाले तत्काल निर्वाचनको मिति घोषणा गर्न माग गरेका हुन् ।

सोलार मिनिग्रिड आयोजनाको सफल परीक्षण

जिल्लाको महावु गाउँपालिका –३ बासीको रिठ्ठामा निर्माणाधीन १२० किलोवाटको जगनाथ भैरव सोलार मिनिग्रिड आयोजनाको परीक्षण सफल भएको छ । सौर्य ऊर्जाबाट विद्युत् निकाली रिठ्ठाका चार सय ६६ घरधुरीमा जडान गर्न वैकल्पिक उर्जा प्रर्बद्धन केन्द्रले निर्माण गरेको सोलार मिनिग्रिड आयोजनाको सफल परिक्षण गरिएको हो ।

अस्पतालका विरामीलाई आरामदायी बेड सुविधा

तनहुँको शुक्लागण्डकी नगरपालिका –५ बेलचौतरास्थित जिपी कोइराला राष्ट्रिय श्वासप्रश्वास उपचार केन्द्रमा आरामदायी बेड जडान गरिएका छन् । विरामीलाई उपचारको क्रममा सहजकता प्रदान गर्न सङ्घीय सरकारको आर्थिक सहयोगमा जडान गरिएको केन्द्रले जनाएको छ । सङ्घीय सरकारको आर्थिक सहयोगमा २५ वटा अत्याधुनिक एचडियु (हाइ डिपेन्डेन्सी युनिट) बेड जडान गरिएको केन्द्रका कार्यकारी निर्देशक डा. रामकुमार श्रेष्ठले जानकारी दिनुभयो ।

घट्यो बैतडीको जनसङ्ख्या

विसं २०६८ को जनगणनाअनुसार बैतडीको जनसङ्ख्या दुई लाख ५० हजार ८९८ रहेकोमा १० वर्षमा घटेर दुई लाख ४४ हजार चार सय पुगेको छ । दश वर्षमा छ हजार ४९८ घटेको साविकको जिल्ला जनगणना कार्यालयका प्रमुख सुरेन्द्रप्रसाद पन्तले बताउनुभयो ।

सरकारी अनुदानका भैंसी लुकीछिपी बिक्री

सरकारी अनुदान पाएका कृषि फर्मले अनुदानको रकमबाट किनेका भैसी विक्री गरेको खुलासा भएको छ । पशु अस्पताल तथा पशु सेवा कर्यालयवाट अनुदान पाएका शारदा नगरपालिका ५ मा रहेको छहरेखोला कृषि कम्पनी र सिद्धकुमाख गाउँपालिका १ वाँझकाँडामा रहेको वस्नेत भैसीफर्मले अनुदानको रकममा खरिद भएका भैसी विक्रि गरेको पाइएको छ ।