माओवादीमा केन्द्रित हुने लहर चलेको छ : अध्यक्ष प्रचण्ड

सत्ता साझेदार दल नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ ले स्थानीय निर्वाचनको मिति नजिकिदै गर्दा पार्टीमा केन्द्रित हुने लहर चलेको बताउनुभएको छ । शुक्रबार माओवादी पार्टी प्रवेशको एक कार्यक्रममा बोल्नुहुदै उहाँले देशमा एकात्मक र केन्द्रिकृत राजतन्त्र प्रणालीबाट संघीयता, समावेशी र समानुपातिक नयाँ प्रणाली ल्याउनमा माओवादी जनयुद्धको मुख्य भूमिका रहेको बताउनुभयो ।

प्रधानमन्त्री देउवालाई दिल्लीमा स्वागत

प्रधानमन्त्री शेरबहादुर देउवा भारतको नयाँ दिल्ली पुग्नुभएको छ । तीन दिने औपचारिक भ्रमणका क्रममा प्रधानमन्त्री देउवा शुक्रबार दिउँसो इन्दिरा गान्धी अन्तर्राष्ट्रिय विमानस्थलमा अवतरण गर्नुभएको हो । विमानस्थलमा भारतका रक्षा तथा पर्यटन राज्यमन्त्री अजय भट्टले प्रधानमन्त्री देउवासहितको टोलीलाई स्वागत गर्नुभएको छ ।

काँग्रेस कार्यवाहक सभापतिको जिम्मेवारी उपसभापति खड्कालाई

नेपाली काँग्रेसले कार्यवाहक सभापतिको जिम्मेवारी उपसभापति पूर्णबहादुर खड्कालाई दिएको छ । नेपाली कांग्रेसका सभापति एवं प्रधानमन्त्री शेरबहादुर देउवा तीन दिने भारत भ्रमणमा जानु भएपछि उपसभापति खड्कालाई कार्यवाहक सभापतिको जिम्मेवारी दिइएको हो ।

प्रधानमन्त्रीको भारत भ्रमण : प्रशासनिक कामको जिम्मेवारी गृहमन्त्री खाँणलाई

प्रधानमन्त्री शेरबहादुर देउवा भारत भ्रमणमा जानु भएपछि उहाँको अनुपस्थितिमा प्रशासनिक कामको जिम्मेवारी गृहमन्त्री बालकृष्ण खाँणलाई दिइएको छ । प्रधानमन्त्री देउवाकै सिफारिसमा नेपालको संविधान अनुसार राष्ट्रपति विद्यादेवी भण्डारीले प्रशासनिक कामको जिम्मेवारी गृहमन्त्री खाँणलाई दिनुभएको हो ।

स्थानीय तहमा एमालेको जित सुनिश्चित : उपाध्यक्ष पौडेल

ललितपुर महानगरपालिका १८ बाट ठूलो सङ्ख्यामा नेता कार्यकर्ता नेकपा (एमाले) मा प्रवेश गरेका छन् । २०४६ सालको जनआन्दोलनपछि पाटन मुक्त क्षेत्र घोषणा भएको दिन आज शुक्रबार नेता कार्यकर्ता पार्टी प्रवेश गरेका हुन । नवप्रवेशीलाई एमाले उपाध्यक्ष विष्णु पौडेल, पोलिटब्युरो सदस्य एवं ललितपुर जिल्ला इन्चार्ज शुशिला नेपाल लगायतले खादा लगाएर पार्टी प्रवेश गराउनुभयो ।