महाभियोग विरुद्धमा एमालेले सडक र सदनबाट विरोध जनाउने

प्रमुख प्रतिपक्षी दल नेकपा (एमाले) ले प्रधानन्यायाधीश चोलेन्द्र शमशेर जबरामाथि सत्ता गठबन्धन दलहरुद्वारा संसद् सचिवालयमा दर्ता गराएको महाअभियोगको विरुद्धमा सडक र सदन दुवै ठाउँबाट विरोध जनाउने निर्णय गरेको छ । संसद भवन बानेश्वरमा सोमबार बसेको संसदीय दलको बैठकले सो निर्णय गरेको प्रमुख सचेतक विशाल भट्टराईले बताउनुभयो ।

सभामुख सापकोटाले बोलाउनुभएको सर्वदलीय बैठक सुरु

सिंहदरबारमा सर्वदलीय बैठक सुरु भएको छ । सभामुख अग्निप्रसाद सापकोटाले बोलाउनुभएको सर्वदलीय बैठक सिंहदरबारमा सुरु भएको हो । सत्ता गठबन्धनले प्रधानन्यायाधीश चोलेन्द्र शम्शेर जबराविरुद्ध महाभियोग प्रस्ताव दर्ता गरेपछि सभामुख सापकोटाले सर्वदलीय बैठक बोलाउनुभएको हो ।

काँग्रेस संसदीय दलको बैठक मङ्गलबार बस्दै

नेपाली काँग्रेसले मङ्गलबार संसदीय दलको बैठक बोलाएको छ । काँग्रेस संसदीय दलकी सचेत पुष्पा भुषालले मङ्गलबार बिहान ९ बजे संसदीय दलको बैठक बोलाइएको जानकारी दिनुभयो । बैठक सङ्घीय संसद् भवनको ल्होत्से हलमा बस्ने सचेतक भुषालले बताउनुभयो ।

एमाले संसदीय दलको बैठक सुरु

प्रमुख प्रतिपक्षी दल नेकपा एमालेको संसदीय दलको बैठक बानेश्वरस्थित संसद भवनमा सुरु भएको छ । पछिल्लो समय प्रधानन्यायाधीश चोलेन्द्र शमशेर जबरामाथि सत्ता गठबन्धनका दलहरुद्वारा संघीय संसद सचिवालयमा महाअभियोगको प्रस्ताव दर्ता गरेपछि एमालेको आइतबार साँझ बसेको सचिवालय बैठकले यसको प्रतिवाद गर्ने जनाएको थियो ।

महाअभियाेग स्थानीय तहको निर्वाचन धकेल्ने प्रयास भएको एमालेको आरोप

प्रमुख प्रतिपक्षी दल नेकपा एमालेले सत्ता गठबन्धनले सर्वोच्च अदालतका प्रधान्यायधीश चोलेन्द्र शमशेर जबरामाथि गरेको महाअभियोगकाे प्रस्ताव दर्ता स्थानीय तहको चुनावलाई पछि धकेल्ने षड्यन्त्र भएको आरोप लगाएको छ ।