राप्रपा पदाधिकारी बैठक सुरु : जबरा र लोहनी सहभागी

राष्ट्रिय प्रजातन्त्र पार्टी (राप्रपा) केन्द्रीय पदाधिकारी बैठक सुरु भएको छ । पार्टी कार्यालय धुम्बाराहीमा बैठक भर्खरै सुरु भएको हो । पार्टीका निवर्तमान अध्यक्ष कमल थापाले दुई दिन अघि पार्टी परित्याग गरेपछि पहिलो पटक केन्द्रीय पदाधिकारी बैठक बसेको हो । बैठकमा निवर्तमान अध्यक्षद्वय पशुपतिशम्शेर जबरा र डा. प्रकाशचन्द्र लोहनी उपस्थिति हुनुहुन्छ ।

राष्ट्रपति भण्डारीद्वारा संस्कृतिविद् जोशीको स्वास्थ्यलाभको कामना

राष्ट्रपति विद्यादेवी भण्डारीले शताब्दी वाङ्यमय पुरुष सत्यमोहन जोशीको स्वास्थ्यलाभको कामना गर्नुभएको छ। राष्ट्रपति भण्डारीका तर्फबाट उहाँका संस्कृति मामिलासम्बन्धी सल्लाहकार माधव शर्मासहित सचिवालयका सदस्य संस्कृतिविद् जोशी उपचाररत ललितपुरको ग्वार्कोस्थित किष्ट अस्पतालमा आज पुगेर स्वास्थ्यलाभको कामना गर्नुभएको हो।

राप्रपा केन्द्रीय पदाधिकारी बैठक बिहीबार

राष्ट्रिय प्रजातन्त्र पार्टी (राप्रपा)ले केन्द्रीय पदाधिकारी बैठक बोलाएको छ। प्रवक्ता मोहन श्रेष्ठका अनुसार बैठक बिहीबार बिहान ११ : ३० बजे पार्टी कार्यालय धुम्बाराहीमा बस्नेछ। निवर्तमान अध्यक्ष कमल थापाले मंगलबार पार्टी परित्याग घोषणा गरेपछि राप्रपाले पदाधिकारी बैठक बोलाएको हो। बैठकमा पछिल्लो राजनीतिक परिस्थितिको समीक्षा र आसन्न स्थानीय तहको निर्वाचनको विषयमा छलफल हुने श्रेष्ठले जानकारी दिनुभयो।

स्थानीय तहको कार्यकाल विषयमा परेको रिट दरपिठ

वैशाख ३० गते स्थानीय तहको निर्वाचन मिति घोषणा भएको विरोधमा सर्वोच्च अदालतमा परेको रिट दरपिठ भएको छ। बुधबार महोत्तरी जिल्ला भंगाहा नगरपालिका २ का संजीवकुमार साहले दायर गर्नुभएको रिट दरपिठ भएको हो। सर्वोच्च अदालतका रजिष्ट्रार नारायणप्रसाद पान्थीले नेपाल सरकारबाट स्थानीय तह निर्वाचन ऐन, २०७३ अनुसार २०७९ वैशाख ३० गतेका लागि मिति घोषणा भएको भन्दै रिट दरपिठ गर्नुभएको हो।

विद्युतीय मतदानबारे अध्ययन गर्न निर्वाचन आयोगले बनायो कार्यदल

निर्वाचन आयोगले स्थानीय तहको निर्वाचनमा विद्युतीय मतदान प्रयोग गर्ने विषय अध्ययन गर्न कार्यदल गठन गरेको छ। बुधबार निर्वाचन आयोगले नेपाल सरकारका उच्चपदस्थ प्राविधिकसँग छलफल गरेर कार्यदल बनाएको हो। आयोगका प्रवक्ता शालिग्राम शर्मा पौडेलका अनुसार विद्युतीय मतदानको विषयमा अध्ययन गर्न सूचना प्रविधि मन्त्रालयको सहसचिवको संयोजकत्वमा कार्यदल गठन भएको हो।