सिन्धुपाल्चोकका विद्यार्थीलाई मोडर्ना खोप

सिन्धुपाल्चोकका १२–१७ उमेरका विद्यार्थीहरुलाई धमाधम कोरोनाविरुद्धको मोडर्ना खोप लगाउन थालिएको छ । विद्यार्थीहरु उत्साहपूर्ण रुपमा खोप लगाउन थालेका छन् ।स्वास्थ्य कार्यालयका वरिष्ठ जनस्वास्थ्य अधिकृत दुर्गादत्त चापागाईंले सिन्धुपाल्चोकका विभिन्न माध्यमिक विद्यालयमा अध्ययनरत २८ हजार ५२५ जना विद्यार्थीलाई खोप लगाउदै गरेको जानकारी दिनु भयो ।

हुम्लामा पहिलो पटक फल्यो स्कुस तरकारी

हिमाली जिल्ला हुम्लामा पहिलो पटक स्कुस फलेको छ । नमुना परीक्षणका लागि लगाएको स्कुस सफल रुपमा फलेको हो ।सर्केगार्ड गाउँपालिका–७ को रोडिकोट गाउँकी किसानी धाँची शाहीले परीक्षणका रुपमा लगाएको स्कुस खेती सफल भएको बताउनुभयो । उहाँले पहिलो पटक नै एउटै बोटबाट तीन क्वीन्टल भन्दा बढी स्कुस फलेको बताउँदै तरकारी खेतीमा यसको संभावना राम्रो देखिएको बताउनुभयो । उहाँले एउटा बोट लगाएकोमा राम्रोसँग फल दिएको बताउनुभयो ।

बालमैत्री शौचालय निर्माण भएपछि बालबालिकालाई सहजता

बाजुराको बडिमालिका नगरपालिकाले सबै विद्यालयमा बालमैत्री शौचालय निर्माण गरेपछि अहिले बालबालिकाहरुलाई शौचालय जान निकै सहज बनाएको छ । यसअघि विद्यालयमा बालमैत्री त के सामान्य शौचालय पनि निर्माण नहुँदा अशक्त, अपाङ्ग, असहाय बालवालिकाहरुलाई दिसापिसाव गर्न निकै समस्या भोग्नु परेको थियो ।

खोलामा काठको ड्याम लगाएर तर्नुपर्ने बाध्यता

दक्षिणी हुम्लामा पैदल यात्रा गर्दा खोलामा काठको ड्याम लगाएर तर्नुपर्ने बाध्यता आएको छ ।

नेपालमा २२ प्रजातिका चरा लोप, तराईमा भँगेरा लोप हुँदै

धनुषालगायत तराईका घर आँगन र खेतबारीमा सहजै देखिने भँगेरा हाल निकै कम देखिने गरेको छ । बढ्दो तापक्रम र मानिसले मासुकोरुपमा प्रयोग गर्न थालेपछि भँगेरा कम देखिएका हुन् ।