कोरोनाविरुद्धको खोप लगाएका एक व्यक्तिको मृत्यु

कैलालीमा आइतबार कोरोनाविरुद्धको खोप लगाएका एक व्यक्तिको खोप लगाएको केही समयपछि मृत्यु भएको छ । कैलारी गाउँपालिका–४ ‘के गाउँ’ का ५३ वर्षीय रामदास डङ्गौराको मृत्युभएको हो ।

स्वास्थ्यकर्मी सन्क्रमित भएपछि भरतपुर अस्पतालको सेवा बन्द

भरतपुर अस्पतालका चिकित्सक, नर्स, स्वास्थ्यकर्मी लगायत कर्मचारीहरु धमाधम संक्रमित हुन थालेपछि विशेष ओपिडी (जिओपिडी) र नियमित अप्रेशन (शल्यक्रिया) सेवा बन्द गरिएको छ । अस्पताल प्रशासनले एक सूचना प्रकाशित गरी जिओपिडी र नियमित अप्रेशन सेवा अर्को सूचना नभएसम्मका लागि स्थगित गरेको जनाएको हो ।

उपत्यकामा ३८ सय ७१ कोरोना संक्रमित थपिए

पछिल्लो २४ घण्टामा काठमाडौं उपत्यकामा मात्र तीन हजार ८ सय ७१ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका सह–प्रवक्ता डा. समीरकुमार अधिकारीका अनुसार काठमाडौंमा २८ सय ६८, ललितपुरमा ६०२ र भक्तपुरमा ३२१ गरेर ३८ सय ७१ जनामा संक्रमण पुष्टि भएको हो ।

२४ घण्टामा पाँच हजार ५९८ संक्रमित थपिए : चार जनाको मृत्यु

पछिल्लो २४ घण्टामा १३ हजार ३७७ जनाको पीसीआर परीक्षण गर्दा पाँच हजार ५९८ जनामा कोरोना संक्रमण पुष्टि भएको छ । त्यसैगरी चार हजार ६० जनाको एन्टिजेन परीक्षण गर्दा ८६४ जनामा संक्रमण पुष्टि भएको छ । स्वास्थ्य तथा जनसंख्या मन्त्रालयका सह–प्रवक्ता डा. समीरकुमार अधिकारीका अनुसार कुल १७ हजार ४३७ जनाको परीक्षण गर्दा ६ हजार ४६२ जनामा कोरोना पुष्टि भएको छ ।

टेकु अस्पतालमा खोप अभियान स्थगित

टेकुस्थित शुक्रराज ट्रपिकल तथा सरुवा रोग अस्पतालमा कोरोना भाइरस विरुद्धको खोप अभियान स्थगित भएको छ । अस्पतालले आइतबार विज्ञप्ति निकाल्दै माघ १० गते देखि १६ गतेसम्म सात दिनको लागि खोप अभियान स्थगित भएको जानकारी दिएको हो । अस्पतालका ५० बढी चिकित्सक, स्वास्थ्यकर्मी तथा कर्मचारी कोभिड–१९ बाट संक्रमित भएपछि खोप अभियान स्थगित गरिएको विज्ञप्तिमा उल्लेख गरिएको छ।