गरिब मुलुकमा खाद्यवस्तुको थप मूल्यवृद्धि हुने दाबी

विश्व व्यापार सङ्गठनकी महानिर्देशक एनगोसी ओकोन्जो इबेयलाले यूक्रेन सङ्कटका कारण खाद्य पदार्थको मूल्यवृद्धि भएको दाबी गर्नुभएको छ । उहाँका अनुसार खाद्य पदार्थको मूल्य वृद्धि भएपछि खाद्य सङ्कट पनि बढ्ने खतरा देखिएको छ । खाद्य पदार्थमा भएको मूल्यवृद्धि र खाद्य सङ्कटको असर सबैभन्दा बढी गरिब देशहरूमा पर्न सक्ने पनि उहाँले बताउनुभयो ।

चारलाख दुई हजार युक्रेनी जनता रुसकाे शरणमा

आफ्ना नागरिकलाई जबर्जस्ती रुसमा लगेको युक्रेनले आरोप लगाएको छ । द्वन्द्वग्रस्त इलाकाबाट करिब चारलाख दुई हजार युक्रेनी जनतालाई रुसमा लगेको आरोप लगाएको हो । युक्रेनका अनुसार युक्रेनमा लगिएका युक्रेनी जनतालाई राजधानी किभमाथि दबाब दिन प्रयोग गरिने सक्ने विषयमा आशंका गरिएको छ ।

चिनियाँ विदेशमन्त्री भारत भ्रमणमा

चीनका विदेश मन्त्री वाङ यी भारत भ्रमणमा आउनुभएको छ । भ्रमणका क्रममा उहाँले शुक्रबार सरकारी उच्च अधिकारीहरूसँग भेटवार्ता गर्नुभएको समाचारमा जनाइएको छ । उहाँले भारतीय समकक्षी एस जयशङ्करसँग प्रतिनिधि मण्डलसहित हैदरावाद हाउसमा भेटवार्ता गर्नुभएको छ । त्यसअघि उहाँले भारतको राष्ट्रिय सुरक्षा सल्लाहकार अजित डोभलसँग उहाँकै कार्यालय साउद ब्लकमा भेटवार्ता गर्नुभएको अधिकारीहरूले जनाएका छन् ।

डिनिप्रो शहरकाे युक्रेनी सैनिक अखडामा दुईवटा क्षेप्यास्त्र हमला

रुसी फौजले डिनिप्रो शहरमा रहेका युक्रेनी सैनिक अखडामा दुईवटा मिसाइल (क्षेप्यास्त्र) हमला गरेको छ । युक्रेनको चौथौं ठूलो शहर डिनिप्रोमा भएको हमलामा भवनहरु ध्वस्त भएको र आगो लागेको क्षेत्री विपद सेवाले जानकारी दिएको हो ।

भारतमा कोरोनाका दैनिक सङ्क्रमित दुई हजारभन्दा कम

भारतमा कोरोनाभाइरसबाट दैनिक सङ्क्रमितको सङ्ख्या दिनप्रति दिन घट्दै गइरहेको छ । भारतमा पछिल्लो २४ घण्टामा दुई हजारभन्दा कम सङ्क्रमित भएका केन्द्रीय स्वास्थ्य तथा परिवार कल्याण मन्त्रालयले बिहीबार जानकारी दिएको छ । भारतमा हाल सक्रिय सङक्रमितको सङ्ख्या २३ हजार ८७ पुगेको अधिकारीले जनाएका छन् । सक्रिय सङ्क्रमितको यो सङ्ख्या कूल सङ्क्रमितको ०.०६ प्रतिशत रहेको समाचारमा जनाइएको छ ।