राष्ट्रिय भूमि आयोग र स्थानीय तहबीच कार्यगत सम्झौता

तनहुँमा राष्ट्रिय भूमि आयोग र स्थानीय तहसँग कार्यगत सम्झौता भएको छ । दुई पक्षबीच भूमिहीनको लगत सङ्लनसम्बन्धी समझदारीपत्रमा दमौलीमा हस्ताक्षर गरी सम्झौता गरिएको हो । भूमि आयोग जिल्ला समिति तनहुँका अध्यक्ष रामचन्द्र अधिकारीको उपस्थितिमा आयोगका विज्ञ सदस्य वासुदेव हुमागाई, अमिन केशवराज डाँगी, प्रमुख नापी अधिकृत जनकराज भट्ट र स्थानीय तहबीच समझदारी गरिएको हो ।

कपिलवस्तुमा कागज उद्योग र प्राङ्गारिक मल कारखाना खुल्दै

कपिलवस्तुमा कागज उद्योग र प्राङ्गारिक मल कारखाना खोल्ने तयारी गरिएको छ । सो कारखाना खोल्न कपिलबस्तुको विजयनगर गाउँपालिकामा लुम्बिनी प्रदेश योजना आयोगको एक टोलीले अनुगमन गरेको हो । योजना आयोगका सदस्य शिवपुजन यादवकाअनुसार विजयनगर गाउँपालिका –४ स्थित देउपुराको पुर्व सुरई नदीको छेउमा कागज उद्योग र प्राङ्गारिक मल कारखाना खोल्ने तयारी गरिएको बताउनुभयो ।

नगर कार्यपालिका पुग्ने वडाका सडक कालोपत्रे गरिँदै

बाँकेको कोहलपुर नगरपालिकामा साविक कोहलपुर गाविसका ७ वटा, रझेना गाविसका ६ वडा र शम्शेरगञ्ज गाविसका २ गरी १५ वडाकै नगर कार्यालय पुग्ने सडक कालोपत्रे गरिनेभएका छन् ।

सडक बनेपछि उजाड बन्याे दाेलखाकाे गुमुखोला बजार

कुनै दिन अब्बल व्यापार, आवतजावतले भीभाड हुने दोलखाको उत्तरी गुमुखोला बजार अहिले सुनसान र बैरागलाग्दो बनेको छ । २०६० सालमा माथिल्लो भेगबाट सडक बनेपछि विस्तारै बजारक्षेत्रमा चहलपहल हराउँदै गयो । भूकम्पपछि गुमुखोला बजारै खण्डहरमा परिणत भयो । स्थानीय बसाइँ सरेपछि बजार सुनसान भएको ७० वर्षीया व्यापारी रामकुमारी श्रेष्ठले बताउनुभयो ।

पचास लाखको अक्षयकोष स्थापना गर्दै काँग्रेस

नेपाली काँग्रेस बागलुङ क्षेत्र नम्बर– १ ले ५० लाख रुपियाँको अक्षय कोष स्थापनाको अभियान सुरु गरेको छ । व्यवस्थित पार्टी कार्यालय, दक्ष कर्मचारी व्यवस्थापन, सदस्यको अभिलेखिकरण तथा लेखन र प्रकाशनको काम नियमित गर्ने उद्देश्यकासाथ कोष स्थापना गर्न लागिएको हो ।