ताप्लेजुङका अधिकांस ग्रामीण सडक अवरुद्ध

गत आइतबारदेखिको निरन्तर परेको वर्षाका कारण ताप्लेजुङमा अधिकांस ग्रामीण सडकमा क्षति पुगेको छ । प्रायः ग्रामीण सडकहरु कच्ची भएका कारण निरन्तरको वर्षाले क्षति पु¥याएको हो । आइतबारदेखि बुधबार साँझसम्म नै अविरल परेको वर्षाले ग्रामीण सडक ठाउँ–ठाउँमा भत्किनुका साथै माथिबाट ढिस्को (पहिरो) झरेर अधिकांस सडकहरु क्षतिग्रस्त भएको स्थानीयले बताएका छन् ।

रतुवा खोलाले सात घर बगायो, १७ घर उच्च जोखिममा

लगातारको अविरल वर्षासँगै रतुवा खोलामा आएको बाढीले दमक ७ स्थित गेटवानका ७ वटा घर बगाएको छ भने १७ वटा घरह उच्च जोखिममा परेका छन् ।

विराटनगर विमानस्थल दिउँसो १ बजेसम्मका लागि बन्द

वर्षादका कारण जलमग्न भएपछि विराटनगर विमानस्थल दिउँसो १ बजेसम्मका लागि बन्द गरेको छ । त्रिभुवन अन्तर्राष्ट्रिय विमानस्थलका प्रवक्ता रिन्जी शेर्पाका अनुसार विराटनगरले दिउँसो १ बजेसम्म सफाइ गर्न समय लाग्ने भएकाले बन्द गर्ने जानकारी दिएको बताउनुभयो ।

निर्माणाधीन इनरुवा सबस्टेसन डुवानमा, कम्पाउण्ड बाल बगायो

अविरल वर्षासँगै सुनसरी खोलामा आएको बाढीका कारण सुनसरीको भोक्राहा नरसिंह गाउँपालिकामा निर्माणाधीन चारसय केभी र २२०÷१३२÷३३ केभी इनरुवा सबस्टेसन डुबानमा परेको छ । सुनसरी खोला नै सबस्टेसनमा पस्दा ठूलो क्षति पुगेको छ । आगामी पुसभित्र (डिसेम्बर २०२१) निर्माण सम्पन्न गरी संचालन गर्ने (चार्ज)लक्ष्यका साथ दुवै सबस्टेसनको काम भइरहेको थियो ।

इटहरीकाे खेतीखाेलामा आएकाे बाढीले तीनजना बगायो

अबिरल बर्षापछिको इटहरीबजारको बीच भागबाट बग्ने खेतीखोलमा आएको बाढीले तीनजनालाई बगाएको छ । हाल सो क्षेत्रमा नेपाल प्रहरी सशस्त्र प्रहरी तथा नेपाली सेना परिचालन गरिएको नेपाली सेनाको इटहरीस्थित २ नं बाहिनीका बाहिनीपति प्रकाश देउजाले बताउनुभयो ।

धरान–धनकुटा सडक पूर्ण रुपमा अवरुद्ध

लगातारको बर्षाका कारण धनकुटाका विभिन्न स्थानमा पहिरो र वाढीले गर्दा ग्रामीण तथा कालोपत्रे सडक अबरुद्ध भएका छन् । उक्त सडक अबरुद्ध हँुदा सवारी साधान अलपत्र परेका छन् भने यात्रुलाई गन्तब्यमा पुग्न कठिनाई भई विचैमा अलपत्र परेका छन् । अविरल वर्षाले लेउती खोलामा आएको बाढीले कालोपत्रे सडक बगाउँदा कोशी राजमार्ग अन्तर्गत धरान–धनकुटा सडक पूर्ण रुपमा अवरुद्ध बनेको छ ।

पहिरोले घर पुरिँदा एकै परिवारका दुई बालबालिकाको मृत्यु

केहि दिनदेखि जारी अविरल वर्षाका कारण गएको पहिरोले घर पुरिँदा दूई बालबालिकाको मृत्यु भएको छ । पहिरोले घर पुरिँदा  धरान उपमहानगरपालिका वडा नम्बर १३ नागेश्वर मार्ग बस्ने निसान राईको ८ वर्षीया छोरी निसु राई र ४ वर्षीया छोरा निहान राईको मृत्यु भएको हो ।

निरन्तरको वर्षाले धान र कोदो बालीमा क्षति

ताप्लेजुङमा निरन्तरको वर्षाले किसानले लगाएको धान तथा कोदो बालीमा क्षति पु¥याएको छ । दुई दिनदेखि निरन्तर वर्षा भइरहेको र वर्षाले पाक्न लागेको धान साथै कोदो बालीमा नराम्ररी क्षति पु¥याएको हो ।

पसाउन लागेको धानमा वर्षाले ठूलो क्षति

झापामा दुई दिनदेखि लगातारको हावाहुरीसहितको बर्षाका कारण किसानको पसाउन लागेको धानमा क्षति पुगेको छ । दमक ३ का शुकदेव लुँइटेलकाअनुसार पसाउन लागेको धानबाली हावाहुरीले नमज्जाले क्षति पुगेको छ ।

ताप्लेजुङ जिल्ला अस्पताललाई ५० शैयामा स्तरोन्नति गरिँदै

ताप्लेजुङ जिल्ला अस्पताललाई स्तरोन्नति गरिने भएको छ । जिल्ला अस्पताललाई १५ शैयाको क्षमताबाट ५० शैयामा स्तरोन्नति गर्न लागिएको हो ।