दमौली, कात्तिक ८ गते । गण्डकी प्रदेशका मुख्यमन्त्री पृथ्वीसुब्बा गुरुङले दुई ठूला छिमेकी देशबीच सम्बन्ध सुदृढ गर्न प्रधानमन्त्री केपी शर्मा ओली नेतृत्वको सरकार सफल भएको बताउनुभएको छ ।
नेपाल कम्युनिष्ट पार्टी (नेकपा)तनहँुले बडादशैँ, तिहार, नेपाल संवत्, छठ, बकरइदलगायत चाडपर्वका अवसरमा आज यहाँ आयोजना गरेको शुभकामना आदानप्रदान कार्यक्रमलाई सम्बोधन गर्दै उहाँले नेकपाले अङ्गिकार गरेको सन्तुलित परराष्ट्रनीतिले दुई ठूला मुलुकबीच सुदृढ सम्बन्ध स्थापित भएको बताउनुभयो ।
सदियौँदेखि अरुबाट हेपिएको अवस्थामा रहेको नेपालको अवस्था आज त्यस्तो नरहेको चर्चा गर्नुहुँदै मुख्यमन्त्री गुरुङले भन्नुभयो, “भूगोलका आधारमा देश ठूलो–सानो भए पनि सार्वभौमिकता, न्याय र स्वतन्त्रता स्थापित हुनुपर्छ भन्ने मान्यता पहिलोपटक स्थापित भएको छ ।” उहाँले नेपाल कुनै शक्तिको खेलमैदान नरहेको प्रमाणित भइसकेकाले यसलाई कायम राखिरहनुपर्नेमा जोड दिनुभयो । “केपी ओली नेतृत्वको सरकारको सन्तुलित परराष्ट्रनीतिका कारण आज नेपाललाई विदेशीले हेर्ने दृष्टिकोण बदलिएको छ”, उहाँले भन्नुभयो ।
विसं २०७४ को निर्वाचनले नेपालमा अब धेरै पार्टी आवश्यक छैन भन्ने म्याण्डेट दिएकाले समृद्ध नेपाल बनाउन सबै एकजुट भएर लाग्नुपर्नेमा मुख्यमन्त्री गुरुङले जोड दिनुभयो । प्रदेश सरकारमा आधारभूत संरचना र कानून निर्माण भएकाले अब विकासको बाटोमा अगाडि बढ्ने उहाँले बताउनुभयो ।
मुख्यमन्त्री गुरुङले चाडपर्व सांस्कृतिक सम्पदा भएकाले सबै धर्म र जातिका चाडपर्वको संरक्षणका लागि सरकार प्रतिबद्ध रहेको उल्लेख गर्नुभयो । सांस्कृतिक सहअस्तित्व, राष्ट्रिय एकता सार्थक बनाउन सबैलाई आह्वान गर्दै उहाँले भन्नुभयो, “सामाजिक सद्भाव, धार्मिक सहिष्णुता कायम गर्न चाडपर्वले प्रेरणा दिन्छ ।”
नेकपाका जिल्ला अध्यक्ष एवं सांसद केदार सिग्देलको अध्यक्षतामा आयोजित कार्यक्रममा गण्डकी प्रदेशका आर्थिक मामिला तथा योजनामन्त्री किरण गुरुङ, प्रदेशसभा सदस्य आशा कोइराला, डोबाटे विक, सरिता गुरुङ, सांसद कृष्णकुमार श्रेष्ठ, जिल्ला समन्वय समितिका प्रमुख शान्तिरमण वाग्ले, व्यास नगरपालिकाका प्रमुख बैकुण्ठ न्यौपानेलगायत सहभागी हुनुहुन्थ्यो ।
