अमरराज नहर्की
तनहुँ, असार ११ गते । पृथ्वी राजमार्गमा पर्ने तनहुँको बन्दीपुर गाउँपालिका– १, नाहालामा सडक भासिँदा सोमबारदेखि पटकपटक अवरुद्ध हुँदैआएको यातायात ड्राइभर्सन गरी सुचारु गरिएको छ । अविरल वर्षाले गर्दा एक साताअघि सडक भासिएको स्थानमा ठूलो पानीको मूल रहेकाले पटकपटक यातायात अवरुद्ध हुँदैआएको थियो ।
शनिबार ड्राइभर्सन गरी शनिबार राति तीन बजेदेखि एकतर्फी यातायात सुचारु गरिएको जिल्ला प्रहरी कार्यालय, तनहुँका प्रमुख अरुण पौडेलले जानकारी दिनुभयो । दुई वटा डोजर प्रयोग गरी सडक भासिएकै ठाउँनजिकबाट ड्राइभर्ट गरी यातायात सुचारु गराइएको प्रहरीले जनाएको छ । प्रहरीका अनुसार ड्राइभर्ट गरिएको र सडक भासिएको ठाउँमा ग्याबियन जाली भर्ने काम भइरहेको छ । चार दिनदेखि उक्त स्थानमा सवारी साधनहरू फस्ने र अवरुद्ध हुने गरेपछि वैकल्पिक मार्गको प्रयोग गरिएको हो । नाहालाको सडक भासिएको ठाउँमा यातायात अवरुद्ध हुँदा यात्रुहरूले घण्टौँ समस्या झेल्दैआएका थिए ।
