शिवराज ढुङ्गाना
अछाम, भदौ ४ गते । बाढीले बगाएर बुधबार दिउँसो शव प्राप्त भएका रामारोशन सैनीबजारका छ जनाको सनाखत बिहीबार भएको छ । मङ्गलबार मध्यरातिको बाढीका कारण बगेर मृत्यु भएका ५४ वर्षीय चन्द्र साउद, ४७ वर्षीया लालसरा शाही, ४५ वर्षीय अमर शाह, ३५ वर्षीया गौरी शाह, २२ वर्षीया ललिता बुढा (साउद) र १२ वर्षीय नवीन साउदको सनाखत भएको मृतकका आफन्त जनक साउदले जानकारी दिनुभयो ।
बाढीले बगाएर ल्याएर कैलाशखोला नदीको विभिन्न स्थानमा फेला परेका शव बुधबार नै जिल्ला अस्पताल ल्याए पनि पहिचान हुन सकेको थिएन । मृतकका आफन्त आएर हेरेपछि शवको पहिचान भएर पोष्टमार्टम् भइरहेको मङ्गलसेनमा रहेका मृतकका आफन्त जनकको भनाइ छ ।
नवीनको बाहेक अन्य पाँच जनाको सदरमुकाम मङ्गलसेनस्थित जिल्ला अस्पतालमा शव पोष्टमार्टम भइरहेको छ । बाढीका कारण बेपत्ता रहेका ११ जनाको शव नेपाली सेना, सशस्त्र प्रहरी र जनपद प्रहरीको टोलीले कैलाशखोला नदी किनारमा बुधबारबाट खोजी गरिरहेको छ । सैनीबजारका २२ घर बाढीले बगाएको बताइएको छ ।
२०८१ मंसिर १३ बिहीवार
