ज्येष्ठ नागरिकलाई सम्मान

धनुषाको मिथिला नगरपालिका १ लक्ष्मिनिवासले वडाभित्रका ज्येष्ठ नागरिक, एकल महिला र अपाङ्गता भएकालाई सम्मानित गरेको छ । वडाले विपत्त व्यवस्थापन कार्यक्रमअन्तर्गत ज्येष्ठ नागरिक, एकल महिला र अपाङ्गता भएका गरी पाँचसय जनालाई सोमबार एक कार्यक्रमबीच सम्मानित गरेको हो ।

‘स्थानीय तह संविधानका अधिकारलाई जनताको घरदैलोमा पुर्‍याउँदै छन्’

ऊर्जा, जलस्रोत तथा सिँचाइमन्त्री पम्फा भुसालले संविधानमा उल्लेख भएका अधिकारलाई स्थानीय तहले जनताको घरदैलोमा पुर्‍याएर सेवा गर्दै आएको बताउनुभएको छ । ललितपुर महानगरपालिका–२८ को वडा कार्यालय भवनको आज उद्घाटन गर्दै उहाँले पहिलो पटक अधिकार सम्पन्न भएको जनताको नजिकको वडाले नयाँ अनुभव हासिल गर्दै जनसेवा गरेको आफूले अनुभूत गरेको बताउनुभयो ।

ज्येष्ठ नागरिकको भवनमा नगरपालिका कार्यालय सञ्चालन

सर्लाहीको लालबन्दी नगरपालिका –८, मा निर्माण गरिएको ज्येष्ठ नागरिक भवनमा नगरपालिका कार्यालय राखिएको छ । सहाराविहीन ज्येष्ठ नागरिकलाई संरक्षण दिएर राख्ने उद्देश्यले निर्माण गरिएको सो भवनमा नगरपालिकाको कार्यालय राखिएको हो ।

धादिङ उद्योग वाणिज्य संघमा थपलिया

धादिङ उद्योग वाणिज्य संघको १० औं अधिवेशनबाट अध्यक्षमा विष्णुप्रसाद थपलिया निर्विरोध चयन हुनुभएको छ । धादिङबेसीमा सम्पन्न अधिवेशनले थपलियाको अध्यक्षतामा २१ सदस्य समिति निर्विरोध चयन गरेको हो ।

दुई उपकेन्द्रसहित हुम्लामा ५४ वटा मतदान केन्द्र

आगामी बैशाख ३० गते हुने स्थानीय तहको निर्वाचनका लागि हुम्लाका लागि दुई वटा उपकेन्द्रसहित ५४ वटा मतदान केन्द्र आयोगले निर्धारण गरेको छ । एक हजारभन्दा बढी मतदाता संख्या रहेका दुई वटा मतदान केन्द्रलाई उपकेन्द्र थप गरेर अघिल्लो निर्वाचनभन्दा मतदान केन्द्रको संख्या बृद्धि गरिएको हो ।