केदार तिमल्सिना
बनेपा, भदौ २६ गते । युवालाई अपहरण तथा शरिर बन्धक बनाई फिरौती माग गर्ने तीन जना पक्राउ परेका छन् ।
जिल्ला प्रहरी कार्यालय काभ्रेपलाञ्चोकले काभ्रेको पाँचखाल नगरपालिका– १२ देवभूमीका २३ वर्षिय राजकुमार दनुवारलाई उपहरण तथा शरिर बन्धक बनाई फिरौती माग गर्ने पाँचखाल– १२ तीनघरेका आकाश परियार, काभ्रेको तेमाल गाउँपालिका– ७ माईती भएकी सविना तामाङ र काभ्रे कै रोशी गाउँपालिका– १२ माईती भएकी उमा परियारलाई पक्राउ गरेको हो ।
प्रहरीका अनुसार आकाश र सविना श्रीमान् श्रीमती हुन् । आकाश र सविनालाई बिहिबार राती धुलिखेल नगरपालिका– ४ स्थित २८ किलोबाट पक्राउ गरेको जिल्ला प्रहरी कार्यालय काभ्रेका प्रहरी नायव उपरिक्षक कुमार विक्रम थापाले जानकारी दिनुभयो । प्रतिवादी सविनाले बुधबार दिउँसो राजकुमार दनुवारलाई फोन गरी २८ किलोमा भेट्न बोलाएको र प्रतिवादी सविना तामाङ र उमा परियारले पिडित युवालाई भेटी सविनाले जंगलतर्फ लगेको प्रहरीले जनाएको छ ।
२८ किलोमा भेट भएर जंगलतर्फ गएका राजकुमार र सविना जंगलको एकान्त स्थानमा कुराकानी गरेर बसेको समयमा सविनाका श्रीमान् आकाशलगायत अन्य व्यक्तिले पिडित राजकुमारलाई बन्धक बनाई घटना मिलाउनका लागि ५० हजार रुपैँया माग गरेको प्रहरीको प्रारम्भिक अनुसन्धानबाट खुलेको जिल्ला प्रहरी कार्यालय काभ्रेले जनाएको छ । प्रतिवादीहरुले पिडित राजकुमारलाई बनेपा बुडोलस्थित कर्वड हाउसको शौचालयभित्र बन्धक बनाएर राखेको प्रहरीले जनाएको छ ।
राजकुमार अपहरणमा परेको खबर पाएपछि प्रहरी निरिक्षक सुरेश खत्रीको कमाण्डमा गएको प्रहरी टोलीले बुधबार राती साढे ११ बजे बुडोलको कबर्ड हाउसको शौचालयबाट उद्धार गरेको थियो । अपहरणमा संलग्न व्यक्ति आकाश परियार र सविना तामाङलाई पक्राउ गर्ने क्रममा बिहिबार राती प्रहरीले एक राउण्ड हवाई फायर समेत गरेको थियो ।
प्रहरीले उमा परियारलाई भने शुक्रबार बिहान धुलिखेल २८ किलो चोकबाट पक्राउ गरेको हो । पक्राउ गरेका तीनै जनालाई ‘मुलुकी अपराध संहिता, २०७४’को परिच्छेद–१७ अपहरण वा शरीर बन्धक सम्बन्धी कसूरमा शुक्रबार जिल्ला अदालत काभ्रेबाट म्याद थप गरी थप अनुसन्धान अघि बढाइएको प्रहरीले जनाएको छ ।
