चिनीको मूल्यवृद्धि अस्वाभाविक !

चार/पाँच महिनायता चिनीको भाउ अस्वाभाविक रूपमा वृद्धि भएको छ । बजारमा चिनी आयात कम भएको कारण देखाउँदै साउनयता क्रमशः बढ्दै अहिले चिनी प्रतिकेजी १०० रुपियाँमा किनबेच भइरहेको छ । नेपाल खुद्रा व्यापार सङ्घका अनुसार असारसम्म प्रतिकेजी चिनीको मूल्य ७५ रुपियाँमा कारोबार भएको चिनी अहिले प्रतिकेजी एक सय रुपियाँ पुगेको छ । बढी चिनी खपत हुने दशैँ, तिहारमा बरु चिनीको भाउ ८५/ ९० रुपियाँभन्दा माथि गएको थिएन ।

हवाई भाडा बढ्दा वैदेशिक रोजगारीमा जाने मर्कामा

नेपाल वैदेशिक रोजगार व्यवसायी सङ्घले अन्तर्राष्ट्रिय उडानमा कायम हालैको जहाज भाडा वैदेशिक रोजगारीमा जाने श्रमिकका लागि अत्यन्तै महँगो रहेको भन्दै घटाउनुपर्ने माग गरेकोे छ । बिहीबार संस्कृति, पर्यटन तथा नागरिक उड्डयनमन्त्री प्रेमबहादुर आलेलाई भेट गरी सङ्घको प्रतिनिधि मण्डलले यस्तो माग गरेको हो ।

आलुमा आत्मनिर्भरको बाटोमा

बझाङ जिल्ला आलुमा आत्मनिर्भर हुने भएको छ । गएको वर्षायाममा राम्रो उत्पादन भएको र हिउँदयाममा समेत आलु खेतीलाई प्राथमिकता दिइएकाले यस वर्ष बझाङ आलुमा आत्मनिर्भरको बाटोमा अग्रसार भएको हो । बझाङमा तरकारी र बीउका लागि बर्सेनि झन्डै डेढ करोड रुपियाँ बराबरको आयात हुने गरेको थियो ।

बूढीगण्डकीको मुआब्जा निर्धारणमा ह्रासकट्टी नहुने

जलाशययुक्त बूढीगण्डकी जलविद्युत् आयोजनाको बाँकी मुआब्जामा ह्रासकट्टी नगर्न अर्थ मन्त्रालयले सहमति जनाएको छ । अर्थमन्त्री जर्नादन शर्माको अध्यक्षतामा बसेको बैठकले ह्रासकट्टी नगरी मुआब्जा दिन मनासिव हुने बेहोराको पत्र ऊर्जा, जलस्रोत तथा सिँचाइ मन्त्रालयलाई पठाएको छ ।

‘अर्थतन्त्रमा सङ्कट छैन’

अर्थमन्त्री जनार्दन शर्माले अर्थतन्त्रमा सङ्कट नरहेको बताउनुभएको छ । बिहीबार प्रतिनिधि सभाअन्तर्गतको अर्थ समितिमा आयोजित ‘अर्थतन्त्रमा देखिएका चुनौती र सरकारको योजना’ विषयक छलफल कार्यक्रममा उहाँले अर्थतन्त्रमा देखिएका चुनौती समाधानको स्तरभित्रै रहेको बताउनुभएको हो ।