वडास्तरीय लिगमा भुजुङको ह्याट्रिक

लमजुङको क्व्होलासोंथर गाउँपालिका युवा तथा खेलकुद विकास समितिले आयोजना गरेको वडास्तरीय लिगमा वडा नं. ४ भुजुङले ह्याट्रिक गरेको छ । हालसम्म पाँच पटक आयोजना गरिएको उक्त फुटबल प्रतियोगितामा यो समेत गरी भुजुङेले चारपटक उपाधि जितेको छ । दोस्रो वर्ष वडा नं. ३ घलेगाउँलेले जितेको बाहेक पहिलो वर्ष र पछिल्लो तीन वर्ष भुजुङेले लगातार तीन वर्ष क्व्होलासोथर लिग जित्न सफल भएको हो ।

सरस्वती क्लब शीर्षस्थानमा

सरस्वती युथ क्लब शहिद स्मारक ‘बी’ डिभिजन फुटबलको शीर्षस्थानमा उक्लिएको छ । ललितपुरको एन्फा कम्प्लेक्स मैदानमा मंगलबार भएको खेलमा सातदोवाटोले मध्यपुर युथ एसोसियसनलाई २–१ गोलले हरायो ।

रियल म्याड्रिडको सानदार जित

कप्तान करिम बेन्जेमा चम्किएपछि रियल म्याड्रिडले स्पेनिस ला लिगामा सानदार जित निकालेको छ । सोमबार राति भएको खेलमा रियलले मालोर्कालाई उसैको मैदानमा ३–० गोलले हरायो । एकपक्षीय खेलमा रियललाई जिताउन बेन्जेमाले दुई तथा भिनिसियस जुनियरले एक गोल गर्नुभयो ।

क्रिस्टलसँग बराबरीमा रोकियो सिटी

इङ्लिस प्रिमियर लिग फुटबलको उपाधि दौडमा रहेको म्यानचेस्टर सिटी मध्यम टोली क्रिस्टल प्यालेससँग बराबरीमा रोकिएको छ । सोमबार राति भएको खेलमा सिटीले क्रिस्टल प्यालेससँग गोलरहित बराबरी खेल्दै अङ्क बाँडेको हो ।

सिर्जनालाई पारा तेक्वान्दोमा रजत

नेपाली पारा तेक्वान्दो खेलाडी सिर्जना घिसिङले डब्लुटी प्रेसिडेन्ट कप एसिया रिजनमा सोमबार रजत पदक जित्नुभएको छ । इरानको तेहरानमा भएको प्रतियोगिता अन्तर्गत के–४४ क्याटगोरीको महिला ५२ केजीमुनि सिर्जनाले नेपाललाई रजत पदक दिलाएको उहाँका प्रशिक्षक कविराज नेगी लामाले जनाउनु भएको छ ।

झापा गोल्ड कपमा आर्मी च्याम्पियन

पाँचौँ संस्करणको झापा गोल्ड कप फुटबलको उपाधि विभागीइ टोली त्रिभुवन आर्मी क्लबले जितेको छ । बिर्तामोडस्थित डोमालाल राजवंशी रंगशालामा सोमबार भएको फाइनलमा आर्मीले घरेलु टोली झापा-११ लाई २-१ गोलले हरायो ।

राष्ट्रव्यापी खुला ब्याडमिन्टन चैत ९ देखि

भक्तपुर जिल्ला ब्याडमिन्टन संघको आयोजनामा प्रथम राष्ट्रव्यापी भक्तपुर खुला ब्याडमिन्टन प्रतियोगिता चैत ९ गतेदेखि हुने भएको छ ।

द हिमालयन क्लबले अस्ट्रेलियामा क्रिकेट कार्निभल गर्ने

द हिमालयन क्लबले अस्ट्रेलियाको मेल्बर्नमा कँडेल कन्सल्टेन्सी क्रिकेट कार्निभल आयोजना गर्ने भएको छ । मार्च १९ देखि २८ तारिखसम्म आयोजना हुने प्रतियोगिातमा आठ टोलीको सहभागिता रहने छ ।

हलिउड तेक्वान्दोको २७औँ स्थापना दिवस

अमेरिकाको पोर्टल्यान्डमा रहेको हलिउड तेक्वान्दो स्कुलको २७औँ स्थापना दिवस सोमबार विविध कार्यक्रम गरी मनाइएको छ । हलिउड तेक्वान्दो स्कुलले वर्षका उत्कृष्ट प्रशिक्षार्थीहरुलाई ट्रफी वितरण गर्नुअघि खादा ओढाएर सम्मान गरेको थियो ।

नेपाली टोली श्रीलंकाबाट यूएईतर्फ

युनाइटेड अरब इमिरेट्स (यूएई) मा मार्च १६ देखि २२ सम्म आयोजना हुने आईसीसी विश्वकप लिग–२ मा सहभागिता जनाउन नेपाली नेपाली राष्ट्रिय क्रिकेट टोली सोमबार श्रीलंकाबाट यूएई प्रस्थान गरेको छ ।

हुन्डाई ओपन गल्फ शनिबार

१०औँ संस्करणको हुन्डाई ओपन गल्फ प्रतियोगिता शनिबार हुने भएको छ । पार ७२ को गोकर्ण फरेस्ट गल्फ रिसोर्टमा हुने १८ होलको प्रतियोगितामा एक सय ३० जना एमेच्योर गल्फरको सहभागिता रहने सोमबार आयोजित पत्रकार सम्मेलनमा गल्फ रिसोर्टका निर्देशक दीपक आचार्यले जानकारी दिनुभयो ।

चेल्सी र आर्सनललाई सफलता

इङ्लिस प्रिमियर लिग फुटबलमा चेल्सी र आर्सनलले सफलता हात पारेका छन् । आइतबार राति भएको खेलमा चेल्सीले न्युक्यासल युनाइटेडलाई १-० गोलले हरायो । अर्को खेलमा आर्सनलले लेस्टर सिटीलाई २-० गोलले स्तब्ध बनायो ।

एमबाप्पे र नेयमार चम्किएपछि पीएसजी विजयी

स्टार खेलाडीद्वय केलियन एमबाप्पे र नेयमार चम्किएपछि फ्रेन्च लिग वानमा पेरिस सेन्ट जर्मेन (पीएसजी) ले रेलिगेसनमा रहेको बोर्डेअक्समाथि सानदार जित निकालेको छ । घरेलु मैदानमा आइतबार राति भएको खेलमा पीएसजीले बोर्डेअक्सलाई ३–० गोलले हरायो ।

बार्सिलोनाको सानदार जित

बार्सिलोनाले स्पेनिस ला लिगामा ओसासुनामाथि सानदार जित निकालेको छ । घरेलु मैदानमा आइतबार राति भएको खेलमा बार्सिलोनाले ओसासुनालाई ४–० गोलले हरायो । जितसँगै बार्सिलोना तेस्रो स्थानमा उक्लिएको छ ।

एनएसएल नियम विपरित : ‘ए’ डिभिजन क्लब

‘ए’ डिभिजन क्लबहरुले शहिद स्मारक ‘ए’ डिभिजन लिग चलिरहेको अवस्थामा नेपाल सुपर लिग (एनएसएल) घोषणा गरिनु नियम विपरित भएको उल्लेख गरेका छन् । ‘ए’ डिभिजन क्लबक्लबहरु एनआरटी, मनाङ मस्र्याङदी क्लब, थ्रीस्टार क्लब र संकटा क्लबले आइतबार संयुक्त पत्रकार सम्मेलनगरी यस्तो धारणा राखेका हुन् ।