राजेन्द्र र निकी च्याम्पियन

छैठौं झिल्टुङ क्रसकन्ट्री दौडमा नेपाल एपीएफ क्लबका राजेन्द्र तामाङ र धरानकी निकी नेवान्ग लिम्बु च्याम्पियन बन्नुभएको छ । नुवाकोटमा शनिबार भएको पुरुष १३.५ किलोमटिर दौडमा रामजी बस्नेत दोस्रो र भिम बहादुर गुरुङ तेस्रो हुनुभयो । महिलातर्फ नितु तामाङ दोस्रो र छोकी शेर्पा तेस्रो हुनुभयो ।

यू–१८ महिला साफ टोली भारत प्रस्थान

भारतको जमसेदपुरमा मार्च १५ देखि २५ तारिखसम्म आयोजना हुने यू–१८ महिला साफ महिला च्याम्पियनसिप फुटबलमा सहभागिता जनाउन नेपाली महिला टोली आइतबार भारत प्रस्थान गरेको छ । च्याम्पियनसिपमा नेपाल, भारत र बङ्गलादेशले प्रतिस्पर्धा गर्दैछन् ।

बुद्ध एकेडेमीलाई बास्केटबल उपाधि

बुद्ध एकेडेमीले गोकर्णेश्वर नगरस्तरीय छात्र बास्केटबल प्रतियोगिताको उपाधि जितेको छ । गोकर्णेश्वर नगरपालिकाको आयोजना तथा गोरक्ष स्पोर्टिङ क्लबको संयोजनमा भएको प्रतियोगिताको फाइनलमा आइतबार बुद्ध एकेडेमीले इस्ट पोललाई ८१–१३ को फराकिलो अन्तरले हरायो ।

उमा कुङफुमा बूढानीलकण्ठ टिम च्याम्पियन

आयोजक बूढानीलकण्ठ उमा कुङफु शाखाले बूढानीलकण्ठ नगरस्तरीय उमा कुङफु प्रतियोगिताको उपाधि जितेको छ । सर्वाधिक १७ स्वर्ण जित्दै बूढानीलकण्ठ समग्रमा टिम च्याम्पियन बनेको हो ।

रोनाल्डोको ह्याट्रिकसहित कीर्तिमान

क्रिस्टियानो रोनाल्डोले ह्याट्रिकसहित नयाँ कीर्तिमान रचेपछि म्यानचेस्टर युनाइटेडले इङ्लिस प्रिमियर लिग फुटबलमा टोट्टनहाममाथि रोमाञ्चक जित नकालेको छ । घरेलु मैदानमा शनिबार राति भएको खेलमा युनाइटेडले टोट्टनहामलाई ३–२ गोलले हरायो ।

बागमती प्रदेश खेलकुद सुरु

प्रथम बागमतीे प्रदेश खेलकुद प्रतियोगिता शनिबारदेखि हेटौँडामा सुरु भएको छ । हेटौंडा स्थित पिप्ले क्याम्पा रंगशालामा मुख्यमन्त्री राजेन्द्र पाण्डेले ओलम्पियन बैकुण्ठ मानन्धरलाई ओलम्पिक ट्रर्च हस्तान्तर गरेपछि १५ दिने प्रतियोगिताको विधिवत उद्घाटन भएको थियो ।

नेपालले खेल्ने क्रिकेट सिरिजको खेल तालिका सार्वजनिक

नेपाली राष्ट्रिय क्रिकेट टोलीले घरेलु मैदानमा खेल्ने एकदिवसीय र त्रिदेशीय टी–२० क्रिकेट सिरिजको खेल तालिका सार्वजनिक भएको छ । नेपाल क्रिकेट संघ (क्यान) ले शनिबार पपुवा न्युगिनी (पीएनजी) सँगको एकदिवसीय तथा पीएनजी र मलेसियासँगको त्रिदेशीय टी–२० क्रिकेट सिरिजको खेल तालिका सार्वजनिक गरेको हो ।

खेल पत्रकार सम्मानित

बानियाँटारस्थित पारामाउन्ट एकेडेमीले विभिन्न राष्ट्रिय दैनिकका आठ खेल पत्रकारलाई शनिबार सम्मान गरेको छ । पारामाउन्टले आफ्नो १७औँ अभिभावक दिवस तथा सांस्कुतिक कार्यक्रममा खेल पत्रकारलाई सम्मान गरेको हो ।

खप्तड गोल्डकपमा मनाङ च्याम्पियन

पाँचौँ संस्करणको सुदूरपश्चिम खप्तड गोल्डकप फुटबल प्रतियोगिताको उपाधि जितेको छ । धनगढी रंगशालामा शनिबार भएको फाइनल खेलमा फ्रेन्ड्स क्लबलाई ३–१ गोलले हराउँदै मनाङ च्याम्पियन बनेको हो ।

सुदूरपश्चिम तेक्वान्दोमा शाही

सुदूरपश्चिम प्रदेश तेक्वान्दो संघको अध्यक्षमा सुवाश शाही निर्वाचित हुनुभएको छ । धनगढीमा शनिबार भएको प्रथम प्रदेश अधिवेशनबाट शाहीको अध्यक्षतामा निर्विरोध नयाँ कार्यसमिति बनेको हो ।

आयोजक झापा–११ फाइनलमा

आयोजक झापा–११ पाँचौँ झापा गोल्ड कप फुटबलको फाइनलमा प्रवेश गरेको छ । डोमालाल राजवंशी रंगशालामा शनिबार भएको खेलमा झापाले काठमाडौँको ‘ए’ डिभिजन क्लब संकटालाई २–० गोलले स्तब्ध बनायो ।

रविनलाई आङछिरिङ स्मृति गल्फ उपाधि

दोस्रो संस्करणको स्वर्गीय आङछिरिङ शेर्पा स्मृति गल्फ प्रतियोगिताको उपाधि रविन फुयाँलले जित्नुभएको छ । पार ७२ को गोकर्ण फरेस्ट गल्फ रिसोर्टमा शनिबार सम्पन्न प्रतियोगितामा फुयाँलले ४३ अंक बटुल्नु भयो ।

आरसीटी र वीरगन्जको बराबरी

आरसीटी र वीरगन्ज युनाइटेड क्लबले शहिद स्मारब ‘बी’ डिभिजन लिगमा बराबरी खेल्दै अंक बाँडेका छन् । ललितपुरको सातदोवाटो स्थित एन्फा कम्प्लेक्स मैदानमा शनिबार भएको खेलमा आरसीटी र वीरगन्जले २–२ गोलको बराबरी खेले ।

प्रधानमन्त्री कप महिला भलिबललाई सेन्ट्रल प्लाजाको साथ

नेपालगन्जमा चैत १० देखि १४ गतेसम्म आयोजना हुने प्रधानमन्त्री कप राष्ट्रिय महिला भलिबल प्रतियोगिताको लागि पाँच तारे होटल सेन्ट्रल प्लाजाले प्रायोजन सहयोग गरेको छ । सेन्ट्रल प्लाजाले प्रतियोगितामा सहभागी टोली तथा अफिसियललाई आवास तथा भोजनको व्यवस्थापन सहयोग गर्न लागेको हो ।

मध्यपुरमाथि बाँसबारीको गोल वर्षा

बाँसबारी क्लबले शहिद स्मारक ‘बी’ डिभिजन लिगमा मध्यपुर युथ एसोसिएसनमाथि गोल वर्षा गरेको छ । ललितपुरको सातदोवाटो स्थित एन्फा कम्प्लेक्स मैदानमा शनिबार भएको खेलमा बाँसबारीले मध्यपुरलाई ६–० गोलले हरायो ।