छैटाैं राष्ट्रिय पुरुष खो खो प्रतियोगिता चैत २४ देखि हुँदै

नेपाल खो खो सङ्घले छैटाैं देशव्यापी राष्ट्रिय पुरुष खो खो प्रतियोगिता यही चैत २४ देखि दिनसम्म आयोजना गर्ने भएको छ । बिहीबार कीर्तिपुरस्थित कभर्डहलमा आयोजना हुने यस प्रतियोगितामा दुई विभागीय टोली र सात प्रदेश गरी नौवटा टोलीले प्रतिष्पर्धा गर्न लागेको प्रतियोगिता संयोजक तथा नेपाल खो खो संघका उपाध्यक्ष प्रदिप महर्जनले जानकारी दिनुभयो ।

श्रीलंकन ब्लु स्टारलाई हराउने मच्छिन्द्रको दाबी

शहिद स्मारक लिग च्याम्पियन मच्छिन्द्र फुटबल क्लबले मंगलबार श्रीलंकन क्लब ब्लु स्टारसँग दशरथ रंगशालामा प्रतिस्पर्धा गर्दैछ । साँझ ५ः०० बजे सुरु हुने यस खेलमा मच्छिन्द्रले स्पस्ट जितको लक्ष्य राखेको प्रशिक्षक प्रवेश कटुवालले बताउनुभयो ।

राष्ट्रिय घोडचढी प्रतियोगिता शुक्रबार

सातौँ संस्करणको राष्ट्रिय घोडचढी प्रतियोगिता चैत २५ गते शुक्रबार टुँडिखेलमा हुने भएको छ । नेपाल घोडचढी संघले नेपाली सेनाको सहयोगमा टुँडिखेलमा घोडचढी प्रतियोगिता आयोजना गर्न लागेको हो ।

दीपेन्द्र ‘प्लेयर अफ दी सिरिज’

नेपालका अलराउन्डर दिपेन्द्रसिंह ऐरीले त्रिदेशीय टी–२० सिरिजमा ‘प्लेयर अफ दी सिरिज’ को उपाधि जित्नुभएको छ । नेपालाई च्याम्पियन बनाउन हरेक खेलमा नायकीय प्रदर्शन गर्नुभएका दिपेन्द्रले फाइनल खेलमा समेत ५४ रनको अविजित अर्धशतकीय इनिङ्स र चार विकेटको सानदार प्रदर्शन गर्नुभयो ।

त्रिदेशीय टी–२० सिरिजमा नेपाल च्याम्पियन

मध्यक्रमका ब्याट्सम्यान दीपेन्द्रसिंह ऐरीले अलराउन्डर प्रदर्शन गरेपछि नेपाल त्रिदेशीय टी–२० अन्तर्राष्ट्रिय क्रिकेट सिरिजमा च्याम्पियन बनेको छ । कीर्तिपुरस्थित त्रिवि मैदानमा सोमबार भएको फाइनल खेलमा पपुवा न्युगिनी (पीएनजी) लाई ५० ले हराउँदै नेपाल च्याम्पियन बनेको हो ।

त्रिदेशीय टी–२० सिरिज : नेपालद्वारा पीएनजीलाई १६९ रनको लक्ष्य

त्रिदेशीय टी–२० अन्तर्राष्ट्रिय क्रिकेट सिरिजको फाइनल खेलमा नेपालले पपुवा न्युगिनी (पीएनजी) लाई १६९ रनको विजयी लक्ष्य दिएको छ । कीर्तिपुरस्थित त्रिवि मैदानमा टस हारेर पहिलो ब्याटिङ गरेको नेपालले निर्धारित २० ओभरमा ६ विकेटको क्षतिमा १६८ रन बनाएको हो ।

त्रिदेशीय टी–२० सिरिज : टस हारेर पहिले ब्याटिङ गर्दै नेपाल

त्रिदेशीय टी–२० अन्तर्राष्ट्रिय क्रिकेट सिरिजको फाइनल खेलमा नेपालले अहिले पपुवा न्युगिनी (पीएनजी) विरुद्ध टस हारेर पहिले ब्याटिङ गरेको छ । कीर्तिपुरस्थित त्रिवि मैदानमा पीएनजीले टस जितेर बलिङ रोजेपछि नेपालले ब्याटिङ गरेको हो । नेपाल अपराजित रहँदै उपाधि जित्ने लक्ष्यमा छ ।

उपाधिका लागि नेपाल र पीएनजी भिड्दै

त्रिदेशीय टी–२० अन्तर्राष्ट्रिय क्रिकेट सिरिजको उपाधिका लागि आज नेपाल र पपुवा न्युगिनी (पीएनजी) बीच प्रतिस्पर्धा हुँदैछ । कीर्तिपुर स्थित टियु मैदानमा हुने फाइनल भिडन्तमा नेपाल अपराजित रहँदै उपाधि जित्ने लक्ष्यमा छ ।

नेकोस गण्डकीमा विष्णु पुन निर्वाचित

नेपाल खेलकुद महासंघ (नेकोस) गण्डकी प्रदेश कमिटीको अध्यक्षमा विष्णु पुन निर्विरोध निर्वाचित हुनुभएको छ । पोखरामा सम्पन्न प्रथम अधिवेशनले पुनको अध्यक्षतामा ७५ सदस्यीय प्रदेश कमिटीको चयन गरेको हो । आइतबार सम्पन्नदुईदिने अधिवेशनले दिपेन्द्र पौडेल र साधना पन्तलाई उपाध्यक्षमा निर्वाचित गरेको छ ।

पीएसजीको जितमा नेयमार, एमबाप्पे र मेस्सीको गोल

स्टार खेलाडीहरु नेयमार, केलियन एमबाप्पे र लियोनल मेस्सीले गोल गरेपछि पेरिस सेन्ट जर्मेन (पीएसजी) ले फ्रेन्च लिग वानमा सानदार जित निकालेको छ । घरेलु मैदानमा आइतबार राति भएको खेलमा पीएसजीले लोरियन्टलाई ५–१ गोलले हरायो ।

बार्सिलोना ला लिगाको दोस्रो स्थानमा

बार्सिलोना स्पेनिस ला लिगाको दोस्रो स्थानमा उक्लिएको छ । घरेलु मैदानमा आइतबार राति भएको खेलमा सेभियालाई १–० गोलले हराउँदै बार्सिलोना दोस्रो स्थानमा उक्लिएको हो । बार्सिलोनाको जितमा पेड्रीले निर्णायक गोल गर्नुभयो ।

अपराजित लय कायम राख्दै उपाधि जित्छौँ : कप्तान सन्दीप

नेपाली राष्ट्रिय क्रिकेट टोलीका कप्तान सन्दीप लामिछानेले पपुवा न्युगिनी (पीएनजी) सँग सोमबार हुने त्रिदेशीय टी–२० अन्तर्राष्ट्रिय क्रिकेट सिरिजको फाइनलमा दवाव रहित प्रदर्शन गर्ने बताउनु भएको छ । फाइनल खेलअघि आइतबार आयोजित ट्रफी सार्वजनिक र पत्रकार सम्मेलनमा बोल्दै सन्दीपले यसअघिका खेलमा जस्तै अपराजित रहेर उपाधि जित्न तयार रहेको बताउनुभयो ।

नवराज र विद्यालाई मुवाँथाइ उपाधि

गोकर्णेश्वर मुवाँथाई क्लबका नवराज पराजुली र एपीएफ क्लबकी विद्या गुरुङ मुवाँथाई प्रोफेसनल फाइटतर्फ उपाधि जित्नुभएको छ । फर्पिङमा आइतबार भएको अल नेपाल राष्ट्रव्यापी मुवाँथाई प्रतियोगिताको फाइनलमा नवराज पुरुष ७५ केजी र विद्या ६० केजी महिलामा पहिलो हुनुभएको हो ।

आईसीसी महिला विश्वकपमा अष्ट्रेलिया च्याम्पियन

आईसीसी महिला विश्वकप क्रिकेटको उपाधि अष्ट्रेलियाले जितको छ । न्युजिल्यान्डमा आइतबार भएको फाइनल खेलमा अष्ट्रेलियाले साविक विजेता इङ्ल्यान्डलाई ७१ रनले हरायो । अष्ट्रेलियाले सबै खेलमा अपराजित रहँदै उपाधि चुम्न सफल भयो । यससँगै अष्ट्रेलियाको सातौँ पटक विश्वकप उपाधि हो ।

शीर्षटोली सिटी र लिभरपुल विजयी

इङ्लिस प्रिमियर लिग फुटबलमा शीर्षटोली म्यानचेस्टर सिटी र लिभरपुल दुवै विजयी भएका छन् । शनिबार राति भएको खेलमा सिटीले बर्नलीलाई उसैको मैदानमा २–० गोलले हरायो । अर्को खेलमा लिभरपुलले वाट्फोर्डलाई २–० गोलले नै स्तब्ध बनायो ।